Молитвы во время губительного поветрия

МОЛИТВА ВО ВРЕМЯ ГУБИТЕЛЬНОГО ПОВЕТРИЯ

(Требник)

Господи Боже наш, призри с высоты святыя Твоея на молитву нас грешных и недостойных рабов Твоих, беззаконьми нашими Твою благость прогневавших, и благоутробие Твое раздраживших, и не вниди в суд с рабы Твоими, но отврати страшный гнев Твой, праведно на ны движимый, утоли губительное прещение, устави грозный Твой меч, невидимо безгодно секущий нас, и пощади нищих и убогих рабов Твоих, и не затвори в смерти души наша, в покаянии сокрушенных сердцем и со слезами к Тебе Милосердому, Благоуветливому, и Благопременительному Богу нашему припадающих. Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

КРАТКАЯ МОЛИТВА

(Текст утверждён Патриархом Московским и всея Руси Кириллом в 2020 г.)

Господи Боже наш, не вниди в суд с рабы Твоими, и огради нас от губительнаго поветрия на ны движимаго. Пощади нас смиренных и недостойных рабов Твоих в покаянии с теплою верою и сокрушением сердечным к Тебе милосердному и благопременительному Богу нашему припадающих и на милость Твою уповающих. Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

МОЛИТВА ИНАЯ

(Текст утвержден Блаженнейшим Онуфрием, Митрополитом Киевским и всея Украины в марте 2020 г.)

Боже Великий и Вышний, Благоутробный и Человеколюбивый Владыко, услыши нас, недостойных рабов Твоих, во множестве милости Твоея и низпосли нам помощь Твою во время нашествия болезни губительныя на род человеческий, Твоею Кровию искупленный. Вемы, Господи, яко согрешихом пред лицем Твоим и грехом нашим несть числа. Но умилосердися и отврати от нас гнев Твой праведный, на ны движимый. Не прогневайся на ны зело, Ты бо рекл еси, яко радость бывает на небеси о едином грешнице кающемся. Приими ныне и наше покаяние, слезы и смиренныя молитвы, возносимыя из глубины сердец наших пред святым олтарем Твоим.  Отче щедрот, Боже всякого утешения, укрепи ны молитвами Преблагословенныя Владычицы нашея Богородицы, силою Честнаго и Животворящего Креста, святаго великомученика и целителя Пантелеимона, святителя Луки, исповедника Крымскаго, святых врачей и целителей наших: Агапита, Дамиана, Ипатия Печерских и всех святых земли нашея и прекрати болезненное поветрие и отжени от нас всякую болезнь и немощь, да избавльшеся от всякия напасти рукою Твоею крепкою, поработаем Ти со всяким благодарением. Да яко и ныне причащающеся Твоего неизглаголаннаго Человеколюбия, поем и славим Тя, Творящаго великая и чудная, славная же и изрядная. Яко Ты еси Источник исцелений, Боже наш, и Тебе славу возсылаем, Отцу и Сыну, и Святому Духу, ныне и присно, и во веки веков. Аминь.

 


« »